ຫມາກນັດ ເປັນພືດລົ້ມລຸກຊະນິດຫນຶ່ງທີ່ມີຕົ້ນກຳເນີດມາຈາກ ອາເມລິກາໃຕ້ ລຳຕົ້ນມີຂະຫນາດສູງປະມານ 80-100 ຊັງຕີແມັດ, ສ່ວນການປູກກໍ່ສາມາດປູກໄດ້ງ່າຍດ້ວຍການໃຊ້ຫນໍ່ ຫລື ທີ່ເປັນສ່ວນຍອດຂອງຫມາກທີ່ເອີ້ນກັນວ່າ “ຈອມ” ນຳມາຝັງລົງກັບດິນໄວ້ແລ້ວຈະອອກເປັນຫມາກ.
ລັກສະນະຂອງຫມາກນັດ ເປັນພືດໃບລ້ຽງດຽວຈັດຢູ່ໃນຈຳພວກໄມ້ເນື້ອອ່ອນທີ່ມີອາຍຸໄດ້ຫລາຍປີສາມາດທົນຕໍ່ສະພາບແວດລ້ອມຕ່າງໆໄດ້ດີ ແລະ ປູກໄດ້ໃນດິນເກືອບທຸກແຫ່ງໃນທົ່ວປະເທດ, ເຫມາະສົມແກ່ຊາວສວນທີ່ມີພຶ້ນທີ່ຢູ່ແລ້ວແຕ່ບໍ່ຮູ້ປູກພືດຊະນິດໃດເພື່ອເປັນສິນຄ້າ, ສາມາດສ້າງລາຍຮັບໄດ້ ແລະ ຫມາກນັດກໍ່ເປັນພືດທີ່ຄົນ ນິຍົມບໍລິໂພກເພາະມີລົດຊາດທີ່ແຊບ ແລະ ຫອມຫວານນຳອີກ.
ການປູກຫມາກນັດສາມາດເຮັດໄດ້ດ້ວຍວິທີງ່າຍໆ ສຳລັບ ພຶ້ນທີ່ທີ່ເຄີຍປູກຫມາກນັດມາກ່ອນແລ້ວດ້ວຍການໄຖແລ້ວສັບໃບ ແລະ ຕົ້ນຖິ້ມໄວ້ປະມານ 2-3 ເດືອນແລ້ວໄຖປົກ 1 ຄັ້ງ ຈາກນັ້ນຕາກດິນປະໄວ້ 7-10 ວັນ, ຈາກນັ້ນໃຫ້ພວນ 1-2 ຄັ້ງພ້ອມທັງຍົກຫນານໃຫ້ສູງ 1-5 ຊັງຕີແມັດແລ້ວຂຸດຂຸມປູກຫມາກນັດ, ແຕ່ພຶ້ນທີ່ທີ່ບໍ່ເຄີຍປູກກໍ່ສາມາດໄຖດິນຕາກແດດພ້ອມທັງເກັບເສດຫຍ້າອອກແລ້ວປູກໄດ້ເລີຍ.
ສ່ວນຂັ້ນຕອນຂອງການເລືອກແນວພັນປູກແມ່ນປະຕິບັດໄດ້ດ້ວຍວິທີໃຊ້ຫນໍ່ເພື່ອຂະຫຍາຍພັນ, ເພາະຫມາກນັດຂະຫຍາຍແນວພັນດ້ວຍການໃຊ້ຫນໍ່ເຊັ່ນ: ຂັດຫນໍ່ໃຫ້ມີຂະຫນາດດຽວກັນສຳລັບປູກໃນແຕ່ລະຫນານ ເພື່ອຈະເກັບກ່ຽວໄດ້ພ້ອມກັນ, ບໍ່ຄວນໃຊ້ຫນໍ່ທີ່ຫັກຈາກຕົ້ນແລ້ວເກັບໄວ້ດົນເກີນໄປເພື່ອໄປປູກ, ສ່ວນການເລືອກຫນໍ່ກໍ່ສຳຄັນເພາະຈະສາມາດບັງຄັບການອອກດອກໄດ້ເມື່ອອາຍຸປູກ 8-12 ເດືອນເຊິ່ງຈະຂຶ້ນຢູ່ກັບຂະຫນາດຂອງຫນໍ່ທີ່ໃຊ້ປູກ.
ກ່ອນຈະປູກຫມາກນັດເຮົາຕ້ອງຈຸ່ມຫນໍ່ຫມາກນັດດ້ວຍສານປ້ອງກັນໂລກຮາກເຫນົ່າ ເພື່ອບໍ່ໃຫ້ຫນໍ່ ຫລື ຕົ້ນເຫນົ່າ ໂດຍສະເພາະຖ້າຫາກປູກໃນໄຍະລະດູຝົນ. ການປູກແມ່ນສາມາດເຮັດເປັນແຖວຄູ່ໄລຍະປູກ 30X30X(80-90) ຊັງຕີແມັດ, ປູກໄດ້ປະມານ 7,500-8,500 ຕົ້ນຕໍ່ໄລ່, ແຕ່ຕ້ອງບໍ່ໃຫ້ເກີນ 12,000 ຕົ້ນຕໍ່ໄລ່ ເພາະຈະເຮັດໃຫ້ພືດມີອາຫານບໍ່ພຽງພໍ ແລະ ຈະເລີນເຕີບໂຕຊ້າລົງ.
ສຳລັບການດູແລຮັກສາ ແລະ ການໃຫ້ນ້ຳໃນການປູກຫມາກນັດ, ເຊິ່ງຫມາກນັດບໍ່ຈຳເປັນຕ້ອງໃຫ້ນ້ຳຖ້າຫາກມີປະລິມານນ້ຳຝົນສະຫມ່ຳສະເຫມີຕະຫລອດລະດູການ, ແຕ່ສຳລັບພຶ້ນທີ່ທີ່ບໍ່ມີຝົນພຽງພໍແມ່ນຈະໃຫ້ໃນເມື່ອໄລຍະທີ່ຫມາກນັດກຳລັງເຕີບໃຫຍ່ຄວນໃຫ້ອາທິດລະ 1-2 ລິດຕໍ່ຕົ້ນ, ຫລັງຈາກການໃສ່ຝຸ່ນ ຖ້າຫາກຝົນບໍ່ຕົກຕ້ອງໃຫ້ນ້ຳເພື່ອໃຫ້ຕົ້ນຫມາກນັດດູດຊຶມເອົາຝຸ່ນໄດ້ຫມົດ ຄວນຈະໃຫ້ນ້ຳກ່ອນ- ແລະ ຫລັງການອອກດອກ ຈາກນັ້ນກໍ່ຢຸດການໃຫ້ນ້ຳກ່ອນທີ່ຈະເກັບກ່ຽວປະມານ- 15-30 ວັນ.