ແຄນນອນ (Canon) ປະກາດຄວາມສຳເລັດຄອງແຊ໋ມອັນດັບ 1 ຍອດຂາຍກ້ອງດິຈິຕອລ ປ່ຽນເລນສ໌ໄດ້ທົ່ວໂລກສູງສຸດເຖິງ 10 ຊ້ອນ ຂະນະທີ່ ປີ 2013 ນີ້ລູກຄ້າທົ່ວໂລກຈະໄດ້ພົບກັບກ້ອງຮຸ່ນທີ່ນ້ອຍ ແລະ ເບົາທີ່ສຸດໃນໂລກແນ່ນອນ.
ບໍລິສັດແຄນນອນ ອິງຄ໌ ປະເທດຍີ່ປຸ່ນຖະແຫລງຄວາມສຳເລັດໃນການສ້າງຍອດຂາຍກ້ອງດິຈິຕອລປ່ຽນເລນສ໌ໄດ້ (ກ້ອງດິຈິຕອລ SLR ແລະ ກ້ອງຄອມແພັກ) ທົ່ວໂລກໄດ້ເປັນອັນດັບຫນຶ່ງຕິດຕໍ່ກັນ 10 ປີ ນັບຕັ້ງແຕ່ປີ 2003-2012 ນອກຈາກການຜະລິດກ້ອງດິຈິຕອລປ່ຽນເລນສ໌ໄດ້ແລ້ວແຄນນອນຍັງໄດ້ພັດທະນາເຕັກໂນໂລຊີ ເຊິ່ງເປັນຫົວໃຈຫລັກສຳຄັນຄືເຊັນເຊີຮັບພາບແບບ CMOS ແລະ ຊິບປະມວນຜົນພາບສຳລັບໃຊ້ກັບກ້ອງຕິຈິຕອລປ່ຽນເລນສ໌ໄດ້ ແລະ ໄດ້ນຳເຕັກໂນໂລຊີອັນທັນສະໄຫມທີ່ສຸດໃນດ້ານນີ້ມາໃຊ້ກັບກ້ອງຊີຣີສ EOS 1D, ການພັດທະນາເຊັນຊີ ແລະ ຫນ່ວຍປະມວນຜົນພາບຂອງກ້ອງຮຸ່ນຕ່າງໆເຮັດໃຫ້ແຄນນອນປະສົບຄວາມສຳເລັດໃນການນຳສະເຫນີຜະລິດຕະພັນທີ່ມີປະສິດທິພາບສາມາດຕອບສະຫນອງຄວາມຕ້ອງການຂອງກຸ່ມຜູ້ໃຊ້ທີ່ຫລາກຫລາຍຕັ້ງແຕ່ລະດັບມືອາຊີບໄປຈົນເຖິງຜູ້ໃຊ້ກ້ອງມືຖືໃຫມ່ ແລະ ເຮັດໃຫ້ຍີ່ຫໍ້ແຄນນອນສາມາດຄອງສ່ວນແບ່ງຕະຫລາດສູງສຸດທົ່ວໂລກ.
ໃນປີ 2003 ເຊິ່ງເປັນຍຸກເລີ່ມຕົ້ນຂອງກ້ອງດິຈິຕອລ SLR ແຄນນອນໄດ້ເປີດຕົວກ້ອງຮຸ່ນໃຫມ່ EOS Kiss Digital (EOS Digital Rebel ຫລື EOS 300D Digital ໃນພູມິພາກອື່ນ) ກ້ອງຕິຈິຕອລ SLR ຂະຫນາດນ້ອຍນ້ຳຫນັກເບົາ ແລະ ໃຊ້ວຽກງ່າຍ ເຊິ່ງການເປັນຈຸດເລີ່ມຕົ້ນຄັ້ງສຳຄັນທີ່ເຮັດໃຫ້ແຄນນອນເຕີບໂຕຂຶ້ນໃນຕະຫລາດກ້ອງດິຈິຕອລ SLR ແລະ ສ້າງຍອດຂາຍສູງສຸດທົ່ວໂລກ ນັບແຕ່ນັ້ນມາແຄນນອນມຸ່ງຫມັ້ນພັດທະນາອຸປະກອນດ້ານພາບຄຸນນະພາບສູງ ແລະ ແນະນຳກ້ອງຮຸ່ນໃຫມ່ທີ່ມີປະສິດທິພາບສູງຢ່າງຕໍ່ເນື່ອງ ເພື່ອຊ່າງຖ່າຍຮູບສະຫມັກຫລິ້ນລະດັບສູງເປັນຕົ້ນກ້ອງດິຈິຕອລ SLR ຊີຣີສ EOS 5D ເຊິ່ງເປັນການບຸກເບີກການບັນທຶກພາບດ້ວຍກ້ອງດິຈິຕອລ SLR ອີກດ້ວຍ.
ສ່ວນໃນປີ 2012 ເປັນປີທີ່ແຄນນອນສະຫລອງຄົບຮອບ 25 ປີທີ່ກ້ອງ EOS ອອກສູ່ຕະຫລາດ ແລະ ການເປັນຜູ້ນຳຕະຫລາດທົ່ວໂລກເປັນປີທີ 10 ຕິດຕໍ່ກັນ ໂດຍແຄນນອນໄດ້ເປີດຕົວກ້ອງດິຈິຕອລຄອມແພັກປ່ຽນເລນສ໌ໄດ້ຮຸ່ນເພື່ອຂະຫຍາຍຖານລູກຄ້າໃນກຸ່ມຜູ້ໃຊ້ມືໃຫມ່ EOS M ອີກທັງຍັງມີຮຸ່ນ EOS 6D ກ້ອງດິຈິຕອລ SLR ຂະຫນາດນ້ອຍ ແລະ ນ້ຳ ຫນັກເບົາທີ່ສຸດໃນໂລກທີ່ມາພ້ອມເຊັນເຊີ CMOS ຟູລເຟຣມ ຂະຫນາດ 35 ມີລີແມັດ ເຊິ່ງຊ່ວຍກະຕຸ້ນການເຕີບໂຕຂອງຕະຫລາດໃນກຸ່ມຊ່າງຖ່າຍຮູບສະຫມັກຫລິ້ນສີມືລະດັບສູງ.
ສຳລັບປີນີ້ ແຄນນອນໄດ້ແນະນຳກ້ອງຮຸ່ນ EOS 100D (ຫລືໃຊ້ຊື່ວ່າ EOS Rebel SL1 ຫລື EOS Kiss X7 ໃນພູມິພາກອື່ນ) ກ້ອງດິຈິຕອລ SLR ທີ່ນ້ອຍ ແລະ ເບົາທີ່ສຸດໃນໂລກທີ່ມາພ້ອມເຊັນເຊີ APSCsize ເສີມທັບຜະລິດຕະພັນລະດັບແນວຫນ້າຂອງໂລກຈາກແຄນນອນ ແລະ ກຽມພ້ອມສຳລັບການຮັກສາຄວາມເປັນຜູ້ນຳຕະຫລາດຢ່າງຕໍ່ເນື່ອງເປັນປີທີ 11 ດ້ວຍປະສົບການ ແລະ ຄວາມຊ່ຽວຊານໃນການຜະລິດກ້ອງຖ່າຍຮູບມາຕັ້ງແຕ່ການກໍ່ຕັ້ງບໍລິສັດໃນປີ 1937 ແຄນນອນຍັງຈະເດີນຫນ້າພັດທະນາເຕັກໂນໂລຊີດ້ານພາບທີ່ຫລາກຫລາຍໄປພ້ອມກັບການສ້າງສັນເລນສ໌ ແລະ ກ້ອງຖ່າຍຮູບທີ່ມີຄຸນນະພາບດີເລີດ ເຊື່ອຖືໄດ້ເພື່ອຕອບສະຫນອງ ວາມຕ້ອງການຕ່າງໆຂອງຜູ້ໃຊ້ຕັ້ງແຕ່ລະດັບເລີ່ມຕົ້ນໄປຈົນເຖິງມືອາຊີບຕະຫລອດຮອດເຜີຍແຜ່ນະວັດຕະກຳການຖ່າຍພາບໄປທຸກພູມິພາກທົ່ວໂລກ.
ສ່ວນຄວາມຄືບຫນ້າຂອງຂ່າວການເປີດຕົວກ້ອງດິຈິຕອລຮຸ່ນໃຫມ່ຂອງແຄນນອນຈາກເວັບໄຊ canonrumors.com ລະບຸເຖິງຂ່າວລືວ່າແຄນນອນກຳລັງພັດທະນາກ້ອງ DSLR ຮຸ່ນ ໃຫມ່ເປັນຕົ້ນ EOS 70D ທີ່ຄາດວ່າຈະເປີດຕົວໄລຍະໄຕມາດທີ 2 ຂອງປີນີ້ ແລະ EOS7D Mk.II ທີ່ມີຂ່າວວ່າກຳລັງຢູ່ໃນລະຫວ່າງການພັດທະນາອີກດ້ວຍ.