ກຸ້ງ ຈະປະສົມພັນພາຍໃນ ໂດຍເພດແມ່ຈະມີໄຂ່ຂະຫນາດນ້ອຍໆຢູ່ໃນບໍລິເວນຫົວ ແລະ ເມື່ອໄດ້ປະສົມພັນແລ້ວຈະເຄື່ອນຍ້າຍມາຢູ່ບໍລິເວນທ້ອງ ຈົນກວ່າໄຂ່ຈະແກ່ ເຮົາສາມາດເບິ່ງເຫັນໄດ້ດ້ວຍຕາເປົ່າ ຖ້າໄຂ່ເປັນສີຂຽວເຂັ້ມຈົນກາຍເປັນສີເທົາສະແດງວ່າໄຂ່ແກ່ ແລະ ຈະເລີນເຕີບໂຕໄດ້ດີໃນນ້ຳຂຸ່ນ, ກຸ້ງຈະມັກນ້ຳມີສີຂຽວທີ່ມີໄຮແດງ ແລະ ວາງໄຂ່ລູກກຸ້ງເຊິ່ງລູກກຸ້ງຈະລອຍນ້ຳໃນແນວດິ່ງ.
ການລ້ຽງກຸ້ງຝອຍ ເຮົາສາມາດລ້ຽງໄດ້ຫລາຍວິທີ ໂດຍສະເພາະແມ່ນ ການຂຸດເຮັດບໍ່ລ້ຽງ ຫລື ລ້ຽງໃນບໍ່ພລາສຕິກກໍ່ໄດ້, ແຕ່ມື້ນີ້ຈະແນະນຳ ການລ້ຽງກຸ້ງຝອຍໃນບໍ່ດິນ ເຊິ່ງສາມາດເຮັດເປັນບໍ່ຂະຫນາດ 1 ງານ ຫລື ປະມານ 0,5 ໄລ່, ແຕ່ຖ້າຂຸດຂະຫນາດໃຫຍ່ເກີນໄປຈະເຮັດໃຫ້ການເບິ່ງແຍງບໍ່ທົ່ວເຖິງ, ສ່ວນຄວາມເລິກຂອງບໍ່ກໍ່ປະມານ 1,5 ແມັດ ແລະ ໃສ່ນ້ຳສູງປະມານ 1 ແມັດ,
ສຳລັບ ການລ້ຽງກຸ້ງສິ່ງສຳຄັນໃນການລ້ຽງກໍ່ຄືການປ້ອງກັນສັດຕູ ເພື່ອບໍ່ໃຫ້ເຂົ້າມາທຳລາຍ ສະນັ້ນ ຄວນໃຫ້ບໍລິເວນອ້ອມບໍ່ຕ້ອງໂລ່ງ ເພື່ອບໍ່ໃຫ້ເປັນທີ່ຢູ່ອາໄສຂອງກົບ, ຂຽດ ແລະ ງູທີ່ຈະລົງມາກິນກຸ້ງໃນບໍ່ລ້ຽງ, ນອກນັ້ນ ໃນບໍ່ລ້ຽງຕ້ອງມີການກຳຈັດປາທີ່ເປັນສັດຕູຄືກັນເຊັ່ນ: ປາຄໍ່ ແລະ ປາດຸກ ເຊິ່ງສັດພວກນີ້ ຈັດເປັນສັດຕູຂອງກຸ້ງ ແລະ ຈຳເປັນຫລາຍທີ່ຈະຕ້ອງດຳເນີນການຫາທາງປ້ອງກັນໄວ້ ໂດຍ ບໍລິເວນອ້ອມຮອບບໍ່ຄວນລ້ອມດ້ວຍຕາຂ່າຍຕາຖີ່ໆ.
ຢ່າງໃດກໍ່ຕາມ ໃນໄລຍະຂອງການລ້ຽງກຸ້ງຍັງຈະພົບສັດຕູຊະນິດອື່ນໆອີກຢ່າງຫລວງຫລາຍ, ສະນັ້ນ ກ່ອນຈະປ່ອຍພໍ່-ແມ່ກຸ້ງ ຄວນໃຊ້ນ້ຳມັນດີກາຊວນຖອກລົງໃນບໍ່ເພື່ອກຳຈັດແມງໄມ້ຕ່າງໆ ຫລື ຈະກວດເອົາແມງໄມ້ຂຶ້ນມາກ່ອນເພື່ອເປັນການກຳຈັດສັດຂອງລູກກຸ້ງຈະດີທີ່ສຸດ.
ຈາກນັ້ນ ໃນການກຽມບໍ່ລ້ຽງໂດຍເລີ່ມຈາກການຫວ່ານຝຸ່ນຄອກຈຳນວນ 150-200 ກິໂລກຣາມ, ພ້ອມທັງ ຮຳອ່ອນ 30ກິໂລກຣາມ ແລ້ວໃສ່ນ້ຳສູງ 30-50ຊັງຕີແມັດ ເມື່ອເກີດໄຮແດງ ແລະ ໂລຕິເຟີຈຳນວນຫລາຍທີ່ສາມາດເປັນອາຫານໃຫ້ແກ່ກຸ້ງແລ້ວ ຕ້ອງສັງເກດສີນ້ຳວ່າເລີ່ມເປັນສີຂຽວ ຈາກນັ້ນກໍ່ໃຫ້ນຳເອົາພໍ່-ແມ່ພັນກຸ້ງໃສ່ລົງໄປຈຳນວນ 4-5 ກິໂລກຣາມ.
ສ່ວນພໍ່-ແມ່ພັນກຸ້ງຝອຍ ທີ່ນຳມາລ້ຽງໃນບໍ່ຄວນຄັດເອົາຂະຫນາດໂຕໃຫຍ່ ແລະ ຂະຫນາດໃກ້ຄຽງກັນ ໂດຍສາມາດຄັດໄດ້ທຸກລະດູການ, ຖ້າເປັນຊ່ວງລະດູຮ້ອນຈະເປັນການດີ ເພາະກຸ້ງຝອຍຈະຂະຫຍາຍພັນໄດ້ໄວ້ໃນລະດູຝົນ, ສ່ວນເຕັກນິກໃນການເລ່ງໃຫ້ກຸ້ງວາງໄຂ່ ແລະ ສາມາດສັງເກດໄດ້ວ່າກຸ້ງວາງໄຂ່ ຫລື ບໍ່ ໃຫ້ນຳເອົາສາຍຢ່າງນ້ຳປະປາມາເປີດລົງໃນບໍ່ ໂດຍການເປີດແຮງໆ ປະມານ 10-20 ນາທີ ເພາະ ກຸ້ງມັກຫລີ້ນນ້ຳໄຫລ ແລ້ວຈະດິດຕົວເຮັດໃຫ້ໄຂ່ຕົກລົງມາ (ທຳມະຊາດຂອງກຸ້ງນ້ຳນິ້ງກຸ້ງຈະບໍ່ວາງໄຂ່).
ສ່ວນອາຫານໃນການລ້ຽງກຸ້ງຝອຍ ແມ່ນຈະໃຊ້ຮຳອ່ອນລະອຽດ ແລະ ປາປົ່ນປະສົມເຂົ້າກັນໃນປະລິມານ 3 ຕໍ່ 1 (ຮຳອ່ອນ 3 ສ່ວນຕໍ່ປາປົ່ນ 1 ສ່ວນ) ໂດຍຈາກການສຶກສາໃນຕູ້ລ້ຽງພົບວ່າກຸ້ງສາມາດແພ່ພັນໄດ້ດີ ແລະ ມີປະລິມານຜົນໄດ້ຮັບສູງທີ່ລວມທັງມີການໃສ່ຝຸ່ນຄອກເສີມບາງໄລຍະ ເພື່ອສ້າງນ້ຳຂຽວ.
ສຳລັບ ໄລຍະເວລາໃນການເພາະລ້ຽງກຸ້ງຝອຍນັ້ນ ຈາກການສຶກສາພົບວ່າ ການລ້ຽງກຸ້ງຝອຍຫາກສາມາດປ່ອຍພໍ່-ແມ່ພັນໄດ້ທຸກເດືອນທີ່ພົບວ່າກຸ້ງຝອຍທີ່ມີໄຂ່ແກ່ບໍລິເວນຊ່ອງທ້ອງ ແລະ ເມື່ອກຸ້ງວາງໄຂ່ແລ້ວຈະປະສົມພັນໄດ້ຕໍ່ໄປ ເມື່ອລູກກຸ້ງນ້ອຍໆ ລ້ຽງ 3-4 ເດືອນ ຈະໄດ້ໂຕກຸ້ງທີ່ເຕັມໄວສາມາດຕັກຂາຍໄດ້ ຫລື ຈະຕັກຂາຍເມື່ອເຫັນວ່າກຸ້ງໃນບໍ່ລ້ຽງມີຈຳນວນຫລາຍ ເພາະຫາກກຸ້ງມີຈຳນວນຫລາຍເກີນໄປຈະເຮັດໃຫ້ກຸ້ງບໍ່ໃຫຍ່ ແລະ ຈະກິນກັນເອງໃນລະຫວ່າງການລອກຄາບ.
ນອກຈາກນີ້ ລະຫວ່າງການລ້ຽງອາດຈະມີການເພີ່ມນ້ຳ ຫາກພົບວ່ານ້ຳໃນບໍ່ມີປະລິມານຫລຸດລົງໄປ ຫາກນ້ຳມີຈຳນວນນ້ອຍ ຫລື ຕື້ນກຸ້ງຈະໃຫຍ່ຊ້າ ແລະ ໂຕອ່ອນແອ.