ຫລັງຈາກທີ່ທາງເອເຊີ (Acer) ເປີດຕົວ Iconia W3 ແທັບເລັດລະບົບປະຕິບັດການວິນໂດ 8 ເຮັດໃຫ້ຫລາຍຄົນລວມທັງຜູ້ຂຽນອົດສົງໄສບໍ່ໄດ້ເລີຍວ່າ ແທັບເລັດຂອງເອເຊີຮຸ່ນນີ້ ເມື່ອນຳມາປຽບທຽບກັບ iPad mini ແລ້ວຜົນຈະອອກມາເປັນແນວໃດ ມື້ນີ້ທາງຄໍລຳຜ່າໂລກໄອທີຈະນຳ ແທັບເລັດສອງຕົວນີ້ມາສົມທຽບກັນວ່າຈະມີຈຸດເດັ່ນ ແລະ ຈຸດດ້ອຍແນວໃດ ວ່າແລ້ວກໍ່ໄປຕິດຕາມພ້ອມໆກັນເລີຍ.
ລະບົບປະຕິບັດການ (Operating System)
ໃນເລື່ອງຂອງລະບົບປະຕິບັດການຂອງແຕ່ລະຮຸ່ນນັ້ນ Iconia W3 ນັ້ນຈະໃຊ້ລະບົບປຕິບັດ ການWindows 8 ໂດຍມີຈຸດເດັ່ນໃນເລື່ອງການ ນຳໃຊ້ໄດ້ຂ້ອນຂ້າງເປັນອິດສະຫລະ,ສາມາດລົງໂປຣແກຣມໄດ້ເກືອບທຸກໂປຣແກຣມຈະໃຫ້ຄວາມຮູ້ສຶກວ່າ ເຮົາກຳລັງໃຊ້ໂນດບຸກຢູ່ແລ້ວກໍ່ມີຫນ້າຈໍ Live Tile ທີ່ສະແດງຂໍ້ມູນຈາກຫລາຍແຫລ່ງທີ່ມາໃຫ້ໃນຫນ້າຈໍດຽວ ພ້ອມນັ້ນຍັງສາມາດດັດແປງແກ້ໄຂໄດ້ ເພື່ອເຮັດໃຫ້ຜູ້ໃຊ້ເຂົ້າເຖິງແອບພລິເຄເຊິນໄດ້ ໂດຍງ່າຍ, ການຊິງຄ໌ (Sync) ຂໍ້ມູນລະຫວ່າງອຸປະກອນຕ່າງໆທີ່ໃຊ້ Windows 8 ເຮັດງ່າຍບໍ່ວ່າຈະ ເປັນ Smart Phone, PC, NoteBook, Tablet, Xbox ແລະ ຮອງຮັບ Flash ນຳອີກ.
ໃນສ່ວນຄວາມບໍ່ຫນ້າປະທັບໃຈປານໃດຂອງ Windows 8 ກໍ່ຄືເລື່ອງຂອງແອບພລິເຄເຊິນທີ່ໃຫ້ໂຫລດໃນ Windows Store ຍັງມີຫນ້ອຍການນຳໃຊ້ຂ້ອນຂ້າງຍາກສຳລັບຜູ້ລອງໃຊ້ໃຫມ່ ແຕ່ໃນປະຈຸບັນມີແອບໃຫ້ໂຫລດເຖິງ 150.000 ກວ່າແອບແລ້ວ.
ສ່ວນ iPad Mini ນັ້ນໃຊ້ລະບົບປະຕິບັດການໄອໂອເອສ (iOS) ຈັດການງ່າຍດ້ວຍຫນ້າຈໍ homescreen ຫນ້າດຽວບໍ່ ຊັບຊ້ອນຕາມແບບສະບັບຂອງແອບເປິລ, ມີແອບພລິເຄເຊິນໃຫ້ໂຫລດຫລວງຫລາຍໃນ appstore ແຖມແຕ່ລະແອບກໍ່ມີແຕ່ແນວຄັກໆ, ໃນສ່ວນຂອງຟີເຈີໃຫ້ເລືອກໃຊ້ຫລາຍ OS ສະຖຽນລ່ຽນໄຫລ ປອດໄພບໍ່ມີໄວຣັສເພາະເປັນລະບົບປິດ.
ສຳລັບຂໍ້ເສຍຂອງ iOS ນັ້ນດ້ວຍຄວາມທີ່ເປັນລະບົບປິດເຮັດໃຫ້ການເຊື່ອມຕໍ່ເຂົ້າກັບອຸປະກອນອື່ນໆນັ້ນເຮັດໄດ້ຂ້ອນຂ້າງຍາກຕ້ອງຜ່ານ iTune ເທົ່ານັ້ນ ແຖມ Sync ໄດ້ກັບພີຊີເຄື່ອງດຽວເທົານັ້ນ ຖ້າປ່ຽນເຄື່ອງ Sync ຕ້ອງລ້າງຂໍ້ມູນໃນ iPhoneiPAD ອອກໃຫ້ຫມົດກ່ອນ, ສ່ວນໃນເລື່ອງຂອງແອບພລິເຄເຊິນ ທີ່ມີໂຫລດຫລາຍນັ້ນ ສ່ວນໃຫຍ່ມັກເສຍເງິນ ແລະ ອີກຈຸດຄືບໍ່ຮອງຮັບ Flash.
ນ້ຳຫນັກ (Weight)
ໃນສ່ວນຕໍ່ມານັ້ນ ກໍ່ແມ່ນເລື່ອງຂອງນ້ຳຫນັກທີ່ເປັນຕົວຊ່ວຍໃນການຕັດສິນໃຈອັນດັບຕົ້ນໆ ເລີຍກໍ່ວ່າໄດ້ສ່ວນນີ້ Iconia W3 ມີນ້ຳຫນັກ 500 g ຫລາຍກວ່າ iPad Mini ເຖິງ 192 ກຣາມ ຖືໄດ້ວ່າແຕກຕ່າງກັນຫລາຍ ໂດຍສະເພາະສຳລັບແມ່ຍິງອາດຮູ້ສຶກວ່າຫນັກໃນການລອງຈັບຖືເທື່ອທຳອິດ.
ການສະແດງຜົນ (Display)
ໃນສ່ວນຂອງຈໍສະແດງຜົນ ນັ້ນ Iconia W3 ກິນຂາດເລີຍ ເພາະໃນສ່ວນຂອງຂະຫນາດຫນ້າຈໍນັ້ນມີຄວາມແຕກຕ່າງກັນເລັກ ນ້ອຍພຽງ 0,2 ນິ້ວເທົ່ານັ້ນ ແຕ່ ໃນສ່ວນຂອງການສະແດງຜົນ ນັ້ນ Iconia W3 ຊະນະຂາດຮ້ອຍ ດ້ວຍຄວາມລະອຽດທີ່ຫລາຍກວ່າ iPad Mini ອັນນີ້ກໍ່ຕ້ອງລໍຖ້າໃຫ້ iPad Mini ອັບເດດຫນ້າຈະເປັນ ແບບ Retina Display ເມື່ອໃດຈິ່ງມາເອົາມາປຽບທຽບກັນ ອີກເທື່ອຫນຶ່ງ.
ຫນ່ວຍປະມວນຜົນ (Processor)
ແທັບເລັດຂອງເອເຊີມີໂປຣເຊັດເຊີທີ່ມີປະສິດທິພາບຫລາຍຂຶ້ນເນື່ອງຈາກມັນປະມວນຜົນການເຮັດວຽກດ້ວຍ Quad-CoreIntel Atom Z2760 ຄວາມໄວ 1.8 GHz, ສ່ວນຫນ່ວຍປະມວນຜົນຂອງ iPad mini ໃຊ້ເປັນ Quad-CoreApple A5 ຄວາມໄວ 1 GHz ເຊິ່ງໃນເວັບໄຊ cpuboss.com ໄດ້ຍົກໃຫ້ Acer Iconia W3 ເປັນຜູ້ຊະນະ ໄປດ້ວຍຄະແນນ 5,4 ຕໍ່ 5,2; ສ່ວນຄະແນນຈາກ GeekBench ຜົນປາກົດວ່າ ຊີພີຢູ Intel Atom,1.8 GHz dual core (Z2760) ຊະນະໄປຢ່າງລົ້ນເຫລືອດ້ວຍຄະ ແນນ 1.418 ຕໍ່ 784.
ຫນ່ວຍຄວາມຈຳແຣມ (RAM)
ໃນສ່ວນຂອງຫນ່ວຍຄວາມຈຳແຣມ (RAM) ນັ້ນຈະເຫັນໄດ້ວ່າ Acer Iconia W3 ມາ ພ້ອມຄວາມແຮງເຖິງ 2GB ຊະນະ iPad mini ທີ່ມີພຽງ 512 MB ໄປຢ່າງຂາດຮອຍ.
ຫນ່ວຍຄວາມຈຸ (Storage)
ໃນສ່ວນນີ້ຖືໄດ້ວ່າເປັນຈຸດອ່ອນຂອງສິນຄ້າຕະກູນແອບເປິລ (Apple) ກໍ່ວ່າໄດ້ເນື່ອງຈາກຈຳກັດຫນ່ວຍຄວາມຈຳພາຍໃນມາໃຫ້ໃນຕົວເລີຍເປັນທີ່ຮຽບຮ້ອຍ, ທ່ານບໍ່ສາມາດຊອກຫາຫນ່ວຍຄວາມຈຳສຳຮອງເພີ່ມເຂົ້າໄປໄດ້ເລີຍ ໂດຍເຫັນຈາກ iPad Mini ມີຄວາມຈຸໃຫ້ເລືອກຊື້ໄດ້ເລີຍຄື 16GB, 32GB, 64GB, ໃນສ່ວນຂອງ Acer Iconia W3 ຖືກກຳນົດໃຫ້ມີຫນ່ວຍຄວາມຈຳພຽງແຕ່ 2 ຂະຫນາດເທົ່ານັ້ນຄື 32 GB ແລະ 64 GB ແຕ່ Acer Iconia W3 ຍັງຖືກອອກແບບມາໃຫ້ຮອງຮັບກາຣດຫນ່ວຍຄວາມຈຳເສີມພາຍນອກແບບ microSD Card ໄດ້ສູງສຸດເຖິງ 32GB.
ແບັດເຕີຣີ (Battery)
Acer Iconia W3ໃຊ້ແບັດເຕີຣີຊະນິດ Liion ຄວາມຈຸ 6800 mAh ສ່ວນ iPad Mini ມີຄວາມຈຸຂອງແບັດເຕີຣີພຽງແຕ່ 4400 mAh ຈຸດນີ້ຕ້ອງຍົກໃຫ້ Acer Iconia W3ເປັນຜູ້ຊະນະເພາະເຫັນວ່າມີຄວາມຫລຸດໂຕນກັນຫລາຍ ແຕ່ຕອນໃຊ້ວຽກຕົວຈິງຈະກິນໄຟຫລາຍກວ່າກັນກໍ່ຕ້ອງເປັນອີກເລື່ອງຫນຶ່ງ.
ກ້ອງ (Cameras)
ໃນສ່ວນນີ້ອາດເປັນຕົວຊ່ວຍທີ່ສຳຄັນໃນການຕັດສິນໃຈຊື້ຂອງຫລາຍໆຄົນ ແລະ ກໍ່ຕ້ອງຍົກໃຫ້ iPad Mini ທີ່ມີກ້ອງດິຈິຕອລຕົວຫລັກດ້ານຫລັງຕົວເຄື່ອງຄວາມລະອຽດລະດັບ 5 ລ້ານພິກເຊລກ້ອງຫນ້າພຽງ 1,2 ລ້ານ, ສ່ວນ ຂອງ Acer Iconia W3 ມີກ້ອງຕົວຫລັກດ້ານຫລັງ ແລະ ກ້ອງຫນ້າດ້ວຍຄວາມລະອຽດ 2 ລ້ານພິກເຊລເທົ່າກັນ.
ເລື່ອງອື່ນໆ
Acer Iconia W3ຈະມີຈຸດເດັ່ນຢູ່ບ່ອນວ່າຄີບອດທີ່ເປັນອຸປະກອນເສີມເຊື່ອມຕໍ່ດ້ວຍ Bluetooth ແລະ ຂັບເຄື່ອນດ້ວຍແບັດເຕີຣີຈຳນວນ 2ກ້ອນ ມີ Office 2013ແຖມໃຫ້ລ້າ ໃຊ້ເຮັດວຽກດ້ານເອກະສານໄດ້ Word, Excel, PowerPoint ມາໃຫ້ເລີຍບໍ່ຕ້ອງເສຍເງິນຊື້ມີຊ່ອງສຽບ microSD Card ແຖມຍັງມີຜອດເຊື່ອມຕໍ່ສາຍ micro HDMI ໃຫ້ອີກ (ໃນເລື່ອງຂອງລາຄານັ້ນແນ່ນອນວ່າ Acer Iconia W3ຈະຖືກກວ່າ iPad Mini )
ບົດສະຫລຸບ
ມາຮອດນີ້ກໍ່ສາມາດສະຫລຸບໄດ້ແບບລວມໆຄືສຳລັບທ່ານທີ່ເປັນຄົນມັກການນຳໃຊ້ວຽກແບບອິດສະຫລະຕ້ອງເຮັດວຽກນອກສະຖານທີ່ເລື້ອຍໆ ພ້ອມນັ້ນ ຍັງຕ້ອງການເຊື່ອມຕໍ່ເຂົ້າກັບອຸປະກອນຕ່າງໆຫລາຍຢ່າງ ແລະ ຕ້ອງການໃຊ້ໂປຣແກຣມຈັດການດ້ານເອກະສານເປັນຕົ້ນ Word, Excel, PowerPoint ແມ່ນຂໍແນະນຳໃຫ້ໃຊ້ Acer Iconia W3, ແຕ່ຖ້າທ່ານໃດມັກໃນເລື່ອງຂອງຄວາມບັນເທີງເປັນຫລັກມັກຖ່າຍຮູບ ແລະ ມັກຫລິ້ນແອບພລິເຄຊິນທີ່ຫລາກຫລາຍແລ້ວກໍ່ຕ້ອງແນະນຳໃຫ້ໃຊ້ iPad mini.