ຫມາກມ່ວງ ກໍ່ນັບວ່າເປັນພືດອຸດສາຫະກຳຊະນິດຫນຶ່ງທີ່ຫລາຍປະເທດໃນທົ່ວໂລກໃຫ້ຄວາມສົນໃຈປູກເປັນສິນຄ້າ ແລະ ນິຍົມບໍລິໂພກສູງ, ທັງຫມາກດິບ ແລະ ສຸກ, ນອກຈາກນັ້ນ ຫມາກມ່ວງຍັງສາມາດຂະຫຍາຍພັນດ້ວຍການໃຊ້ແກ່ນກ້າ, ການຕໍ່ກິ່ງ ຫລື ກິ່ງຕອນ ແລະ ສາມາດປູກໄດ້ກັບດິນທຸກປະເພດ, ແຕ່ຫມາກຈະອອກມາຮູບແບບໃດນັ້ນແມ່ນຂຶ້ນຢູ່ກັບສະພາບຂອງແຕ່ລະທ້ອງຖິ່ນ.
ຢ່າງໃດກໍ່ຕາມ ການປູກຫມາກມ່ວງເພື່ອເປັນສິນຄ້ານັ້ນຈະຕ້ອງສຶກສາເຖິງສະພາບຄວາມເຫມາະສົມຕ່າງໆຫລາຍຢ່າງດ້ວຍກັນ, ສ່ວນຜູ້ປູກຄວນຈະເລືອກພື້ນທີ່ໃຫ້ເຫມາະສົມ ເພື່ອໃຫ້ປະຢັດຕົ້ນທຶນໃນການຜະລິດຕະຫລອດຈົນສາມາດຜະລິດຫມາກມ່ວງທີ່ມີຄຸນນະພາບອອກສູ່ຕະຫລາດ.
ຫລັງຈາກ ທີ່ເຮົາກ້າຕົ້ນຫມາກມ່ວງແລ້ວ ກໍ່ຈະເຖິງຂັ້ນຕອນຂອງການປູກ, ສ່ວນການປູກນັ້ນຄວນກະຂະຫນາດຂຸມເລິກ, ກວ້າງ ແລະ ໄລຍະຫ່າງລະຫວ່າງຕົ້ນ, ແຖວຕົ້ນຕໍແມ່ນໃຫ້ຫ່າງກັນ 2,5x2,5 ແມັດ, 4x4 ແມັດ ຫລື ຫລາຍຫນ້ອຍກວ່ານີ້ຕາມຄວາມເຫມາະສົມ, ເຊິ່ງຈະໄດ້ຕົ້ນຫມາກມ່ວງປະມານ256ຕົ້ນຕໍ່ໄລ່, ການປູກແບບນີ້ຈຳຕ້ອງດູແລຕັດແຕ່ງກິ່ງຢູ່ສະເຫມີ.
ສ່ວນການປູກຫມາກມ່ວງບໍ່ວ່າຈະປູກດ້ວຍກິ່ງຕອນ ຫລື ຕົ້ນທີ່ກ້າກໍຕາມ ຕ້ອງເຮັດດ້ວຍຄວາມລະມັດລະວັງບໍ່ໃຫ້ຮາກຂາດຫລາຍເພາະຈະເຮັດໃຫ້ຕົ້ນຫມາກມ່ວງຢຸດການຈະເລີນເຕີບໂຕ ຫລື ຕາຍໄດ້, ຕົ້ນຫມາກມ່ວງທີ່ປູກໄວ້ໃນກະຖັງດົນໆໄປດິນຈະຈັບຕົວກັນແຂງ ແລະ ຮາກກໍ່ພັນກັນໄປມາ, ເວລານຳອອກຈາກກະຖັງແລ້ວ ໃຫ້ບີ່ແຍກດິນກົ້ນຖັງໃຫ້ກະຈາຍອອກເລັກນ້ອຍ, ສ່ວນຮາກທີ່ມ້ວນຕິດກັນນັ້ນເວລາ ຈະປູກໃຫ້ພະຍາຍາມແຍກອອກເທົ່າທີ່ຈະແຍກໄດ້ເພື່ອບໍ່ໃຫ້ຮາກຕິດກັນ ແລະ ເມື່ອນຳໄປປູກກໍ່ຈະໄດ້ເຕີບໂຕໄວຂຶ້ນ.
ກົງກັນຂ້າມຖ້າປູກດ້ວຍວິທີການທາມກິ່ງ ຫລື ກິ່ງທີ່ຕິດຕາໃຫ້ປູກເລິກລະດັບດຽວກັບດິນໃນກະຖັງ ປູກເທື່ອກ່ອນ ຫລື ສູງກວ່າເກົ່າເລັກນ້ອຍ, ແຕ່ຕ້ອງບໍ່ປິດຮອຍທີ່ຕິດຕາ ຫລື ຕໍ່ກິ່ງໄວ້ເພື່ອຈະໄດ້ເຫັນວ່າກິ່ງທີ່ແຕກອອກມານັ້ນແຕກອອກມາຈາກກິ່ງຕໍ່, ຖ້າເປັນກິ່ງທີ່ແຕກຈາກຕົ້ນຕໍ່ໃຫ້ຕັດຖິ້ມໄປ, ເມື່ອປູກສຳເລັດແລ້ວໃຫ້ປັກຫລັກໃກຕົ້ນກັນລົມພັດແລ້ວຫົດນ້ຳໃຫ້ຊຸ່ມ, ສ່ວນຕົ້ນທີ່ນຳມາປູກຖ້າເຫັນວ່າຍັງຕັ້ງຕົວບໍ່ໄດ້ຄືສະແດງອາການຫ່ຽວຕອນແດດກ້າ ຄວນຫາແນວມາບັງແດດກໍ່ຈະຊ່ວຍເຮັດໃຫ້ຕົ້ນຕັ້ງໄວຂຶ້ນ ໃນໄລ ຍະທີ່ຕົ້ນຍັງນ້ອຍຢູ່ນີ້ໃຫ້ຫມັ່ນຫົດນ້ຳຢູ່ສະເຫມີຢ່າໃຫ້ດິນແຫ້ງນ້ຳໄດ້. ສຳລັບ ລະດູການປູກທີ່ດີທີ່ສຸດຄວນເປັນລະດູຝົນ ເພາະຈະປະຍັດເລື່ອງຂອງການໃຫ້ນ້ຳໄດ້ຫລາຍ ແລະ ຕົ້ນກໍ່ຈະຕັ້ງຕົວໄດ້ໄວອີກ, ໂດຍສະເພາະປູກໃນເຂດທີ່ເປັນດິນແຫ້ງແລ້ງບໍ່ມີນ້ຳໃຫ້ແກ່ຕົ້ນຫມາກມ່ວງໄດ້ຕະຫລອດປີ. ດັ່ງນັ້ນຄວນປູກໃນໄລ ຍະຕົ້ນລະດູຝົນ, ໄລຍະທຳອິດອາດຈະຫົດນ້ຳໃຫ້ເລັກນ້ອຍ ເມື່ອຝົນເລີ່ມຕົ້ນຫລາຍໃຫ້ຢຸດການໃຫ້ນ້ຳ ເຊິ່ງ ຈະເຮັດໃຫ້ຕົ້ນສາມາດຕັ້ງຕົວໄດ້ເຕັມທີ່ກ່ອນຈະຫມົດໄລຍະຝົນ ແລະ ສາມາດສູ້ກັບລະດູແລ້ງໄດ້ໂດຍບໍ່ຕາຍ, ສ່ວນພຶ້ນທີ່ທີ່ມີນ້ຳອຸດົມສົມບູນຈະປູກໃນລະດູໃດກໍ່ໄດ້ແລ້ວແຕ່ຄວາມສະດວກ.
ຫລັງຈາກການປູກໃຫມ່ໆ ຖ້າຝົນບໍ່ຕົກຄວນຫົດນ້ຳທຸກວັນ ແລະ ຄ່ອຍໆຫ່າງອອກເປັນ 3-4 ວັນຕໍ່ຄັ້ງຈົນກວ່າຕົ້ນຫມາກມ່ວງຈະຕັ້ງຕົວໄດ້, ການໃຫ້ນ້ຳເປັນສິ່ງຈຳເປັນຢ່າງຫນຶ່ງໃນເວລາເລີ່ມຕົ້ນປູກ ເພື່ອໃຫ້ຫມາກໄດ້ເຕັມທີ່, ການໃຫ້ນ້ຳຢ່າງພຽງພໍຕາມທີ່ຕົ້ນຫມາກມ່ວງຕ້ອງການຈະຊ່ວຍໃຫ້ຕົ້ນຫມາກມ່ວງຈະເລີນເຕີບໂຕຢ່າງສະຫມ່ຳສະເຫມີ ແລະ ບໍ່ສະງັກການຈະເລີນເຕີບໂຕ ເຮັດໃຫ້ໄດ້ຫມາກໄວຂຶ້ນ, ການປູກຫມາກມ່ວງໃນບ່ອນທີ່ນ້ຳບໍ່ອຸດົມສົມບູນຄວນຈະກະເວລາປູກໃຫ້ດີ ແລະ ໃຫ້ຕົ້ນຫມາກມ່ວງໄດ້ຮັບນ້ຳ ຝົນດົນທີ່ສຸດເພື່ອຕົ້ນຈະໄດ້ຕັ້ງຕົວໄດ້ກ່ອນທີ່ຈະຮອດລະດູແລ້ງ ຫລື ອາດປູກກ້ວຍກ່ອນຈຶ່ງປູກຫມາກມ່ວງຕາມລົງໄປກໍ່ຈະເປັນວິທີຫນຶ່ງທີ່ຈະຊ່ວຍປະຍັດການໃຫ້ນ້ຳໄດ້.
ຫມາກມ່ວງມັກດິນທີ່ປອດໂປ່ງ, ດິນຜຸຜຸ່ຍສາມາດລະບາຍນ້ຳ ແລະ ອາກາດໄດ້ດີ ຈິ່ງຄວນໃສ່ປຸ໋ຍອິນຊີເປັນຕົ້ນແມ່ນຈຳພວກຝຸ່ຍຄອກ, ຝຸ່ນບົ່ມໃຫ້ເປັນປະຈຳທຸກໆປີ ເພື່ອປັບປຸງສະພາບດິນໃຫ້ລ້ວນເຫມາະຕໍ່ການຈະເລີນເຕີບໂຕຂອງຕົ້ນຫມາກມ່ວງ, ການໃສ່ປຸ໋ຍອິນຊີອາດຈະໃສ່ປີລະ 2 ຄັ້ງຄື ຕົ້ນລະດູຝົນ ແລະ ທ້າຍລະດູຝົນ, ສຳລັບປຸ໋ຍອິນຊີເຖິງແມ່ນວ່າຈະມີທາດອາຫານທີ່ພືດຕ້ອງການບໍ່ຫລາຍກໍຕາມ, ແຕ່ກໍ່ເປັນປະໂຫຍດຕໍ່ດິນໃນດ້ານອື່ນໆ. ນອກຈາກຈະຊ່ວຍໃນການປັບປຸງດິນໃຫ້ດີຂຶ້ນແລ້ວ ຍັງຊ່ວຍເຮັດໃຫ້ປຸ໋ຍເຄມີທີ່ໃສ່ລົງໄປນັ້ນຖືກນຳມາໃຊ້ປະໂຫຍດໄດ້ຫລາຍຍິ່ງຂຶ້ນເຊັ່ນກັນ.