ກູເກິລ ກຽມບຸກອາຊີອາເວັນອອກສຽງໃຕ້ ແລະ ອາຟຣິກາກາງ-ໃຕ້
Wall Street Journal ສຳນັກຂ່າວຊື່ດັງໃນຕ່າງປະເທດລາຍງານວ່າ ກູເກິລ (Google) ກຽມພັດທະນາລະບົບອິນເຕີເນັດບໍ່ມີສາຍໃນປະເທດກຳລັງພັດທະນາໄດ້ແກ່ປະເທດໃນແຖບອາຊີອາເວັນອອກສຽງໃຕ້ ແລະ ອາຟຣິກາກາງ-ໃຕ້.
ຈາກການລາຍງານຂອງສື່ຊື່ດັງລະບຸວ່າ ກູເກິລກຽມເຂົ້າໂອ້ລົມກັບບໍລິສັດດ້ານການສື່ສານ ຕະຫລອດຮອດເຂົ້າຫາລືກັບຫນ່ວຍງານຂອງລັດໃນຫລາຍປະເທດ ເພື່ອແລກປ່ຽນຄວາມຄິດເຫັນ ແລະ ຂໍອະນຸຍາດໃຊ້ຄື້ນຄວາມຖີ່ທີ່ໃຊ້ສຳລັບການອອກອາກາດລາຍການທາງໂທລະພາບເພື່ອນຳມາເປັນຊ່ອງທາງໃນການສົ່ງສັນຍານອິນເຕີເນັດ ຊ່ວຍໃຫ້ສັນຍານສາມາດເດີນທາງໄປໄດ້ໄກຫລາຍກວ່າໃນປະຈຸບັນ ໂດຍຂະນະທີ່ ກູເກິລກຳລັງພະຍາຍາມທົດລອງການສົ່ງສັນຍານໃນຮູບແບບໃຫມ່ໆ ທັງການໃຊ້ເຮືອເຫາະ ຫລື Balloon ເພື່ອກະຈາຍສັນຍານໃຫ້ກົມພື້ນທີ່ໃນບໍລິເວນກວ້າງ ຫລື ການສົ່ງສັນຍານອິນເຕີເນັດຜ່ານດາວທຽມ ລວມໄປເຖິງການພັດທະນາສະມາດໂຟນແອນດຣອຍ(Android) ລາຄາຖືກສຳລັບການເຊື່ອມຕໍ່ກັບລະບົບອິນເຕີເນັດບໍ່ມີສາຍແບບໃຫມ່ອີກ.
ໂດຍລະບົບອິນເຕີເນັດບໍ່ມີສາຍຂອງກູເກິລໃນປະເທດກຳລັງພັດທະນາໄດ້ເລີ່ມຕົ້ນແດ່ແລ້ວ ເຊັ່ນທີ່ເມືອງເຄບທາວນ໌ ໃນອາຟິກາໃຕ້ ທີ່ມີການໃຊ້ສະຖານີຖານຮ່ວມກັບກ່ອງສັນຍານບໍ່ມີສາຍທີ່ຊ່ວຍໃຫ້ສົ່ງສັນຍານໄດ້ໄກຫລາຍກິໂລແມັດ.
ນັບວ່າໂຄງການອິນເຕີເນັດບໍ່ສາຍຂອງກູເກິລ ຈະເປັນກຸນແຈສຳຄັນທີ່ຈະຊ່ວຍໃຫ້ປະຊາກອນໃນໂລກກວ່າ 7 ພັນລ້ານຄົນສາມາດໃຊ້ບໍລິການອິນເຕີເນັດບໍ່ມີສາຍໄດ້ຢ່າງທົ່ວເຖິງ ໂດຍສະເພາະໃນປະເທດທີ່ກຳລັງພັດທະນາທີ່ອິນເຕີເນັດຈະຊ່ວຍສົ່ງເສີມໂອກາດທາງການສຶກສາຂອງປະຊາກອນໃຫ້ໄດ້ຮບຄວາມຮູ້ຕໍ່ໄປ
ີ
